Gjykata Themelore në Prishtinë ka caktuar masën e paraburgimit prej 30 ditësh për dy shtetas serbë, Zhelko Jagodiq dhe Mihajllo Mihajlloviq, të cilët u arrestuan pas një hetimi disa mujor nga Prokuroria e Prishtinës. Ata dyshohen për mashtrim, falsifikim dokumentesh dhe legalizim të përmbajtjes së rreme në lidhje me një pronë me vlerë 2 milionë euro në Veternik, me sipërfaqe 56 ari. Gjatë hetimeve janë sekuestruar një veturë me vlerë 50,000-60,000 euro, 20,000 euro para, dokumente pronësore të dyshuara si të falsifikuara dhe katër telefona celularë që do të shërbejnë si prova materiale. Prokuroria vazhdon procedurat hetimore për këtë rast të tjetërsimit të pronës dhe veprave të tjera penale të dyshuara.