Në 24 orët e fundit në Shqipëri janë regjistruar 31 vatra zjarri, nga të cilat 3 mbeten aktive dhe 6 nën mbikëqyrje, sipas Ministrisë së Mbrojtjes. Vatrat aktive ndodhen në Malin e Dajtit, Ballenjë të Dibrës dhe Qafën e Helmës në Bulqizë, por nuk paraqesin rrezik për zonat e banuara. Në operacionet e shuarjes janë angazhuar rreth 370 forca operacionale, përfshirë 70 efektivë të Forcave të Armatosura, 22 automjete zjarrfikëse dhe 3 helikopterë, duke përdorur edhe mjete të rënda për terrenet e vështira. Situata në Pukë është përmirësuar ndjeshëm, ku zjarret në Gjegjan, Gojan të Vogël dhe Gojan të Madh janë shuar plotësisht, ndërsa Agjencia Kombëtare e Mbrojtjes Civile dhe strukturat lokale vijojnë monitorimin dhe gatishmërinë për ndërhyrje të mëtejshme.