Në periudhën nga 8 deri më 13 shkurt 2026, në Klinikën e Pediatrisë në Qendrën Klinike Universitare të Kosovës (QKUK) u realizua një mision i suksesshëm për diagnostikimin dhe trajtimin e fëmijëve me sëmundje të lindura të zemrës. Gjatë këtij misioni u skrinuan 92 fëmijë, prej të cilëve 35 u trajtuan me ndërhyrje kardiologjike dhe kardiokirurgjikale, duke përfshirë 26 intervenime kardiologjike dhe 9 kardiokirurgjikale. Ndërhyrjet përfshinë trajtime të ndryshme për patologji si defekti septal ventrikular, defekti septal atrial, stenoza e arteries pulmonare dhe procedura komplekse si rekonstruksioni i traktit dalës të ventrikulit të djathtë dhe procedura Glenn, disa prej të cilave u realizuan për herë të parë në Kosovë. Të gjithë pacientët janë liruar në gjendje të mirë postoperatore, ndërsa tre fëmijë vazhdojnë trajtimin në klinikë dhe gjendja e tyre paraqitet stabile pas kontrolleve të kryera.