Prokuroria Speciale e Kosovës ka ngritur aktakuzë për krime lufte kundër 35 pjesëtarëve të njësive speciale të policisë serbe, të dyshuar për sulmin ndaj familjes Jashari në Prekaz gjatë marsit të vitit 1998. Hetimi, i cilësuar nga prokurori Valdet Gashi si kompleks dhe sfidues, ka mundësuar identifikimin e të gjithë të pandehurve, të cilët sipas provave kanë kryer krime kundër popullsisë civile, duke vrarë 26 persona, përfshirë fëmijë dhe gra. Gashi ka theksuar se të gjithë të dyshuarit janë ende gjallë dhe se aktakuza është ngritur në mungesë, pasi nuk është arritur të sigurohen ata për procedurë penale. Në sulm ka qenë e përfshirë edhe Njësia për Operacione Speciale e Serbisë, e drejtuar nga Milorad Ulemek, i njohur si "Legija", i cili kishte detyrë të drejtonte sulmin ndaj shtëpisë së familjes Jashari.