Në Qendrën Korrektuese të Dubravës ka nisur një program trajnimi profesional për 38 të dënuar, i cili zhvillohet në katër fusha: metalpunues, instalues i ujit dhe kanalizimit, murator dhe zdrukthtar. Ky trajnim organizohet në bashkëpunim me Qendrën për Aftësim Profesional në Pejë dhe ka për qëllim ngritjen e kapaciteteve profesionale të të dënuarve dhe përgatitjen e tyre për riintegrim në shoqëri pas përfundimit të dënimit. Programet e trajnimit do të zgjasin tre muaj dhe do të realizohen nga trajnerë të kualifikuar sipas planit të paraparë, ndërsa kandidatët e suksesshëm do të certifikohen pas përfundimit. Shërbimi Korrektues i Kosovës thekson përkushtimin e tij në ofrimin e programeve që mbështesin rehabilitimin dhe riintegrimin e personave të dënuar.