Në Qendrën Korrektuese në Dubravë, 39 të dënuar përfunduan me sukses programin risocializues “Menaxhimi i Zemërimit” dhe u certifikuan për pjesëmarrjen e tyre. Ky program, i zhvilluar nga zyrtarët Suzana Gusturanaj dhe Labinot Myrtaj, synon të ndihmojë pjesëmarrësit në kontrollin e emocioneve dhe zhvillimin e sjelljeve më konstruktive në situata të ndryshme. Gjatë ceremonisë së certifikimit, drejtuesit e qendrës theksuan rëndësinë e këtyre programeve për krijimin e një ambienti më të sigurt dhe përgatitjen e të dënuarve për kthimin në shoqëri. Sipas tyre, programet risocializuese kontribuojnë në uljen e incidenteve brenda institucionit dhe parandalimin e përsëritjes së veprave penale, duke mbështetur riintegrimin e suksesshëm në komunitet.