Brenda një muaji, Policia e Shqipërisë ka goditur tre raste të tentativës për trafikimin e drogës përmes Portit të Durrësit. Në operacionin e koduar “Anchor 3”, në bashkëpunim me strukturat doganore dhe Policinë Kufitare, u sekuestruan 41 kilogramë e 350 gramë kokainë me vlerë tregu rreth 2 milionë euro. Droga ishte fshehur në 37 paketime të vendosura në kapakët e jashtëm të një kontejneri me mish pule, i cili vinte nga Brazili. Hetimet vijojnë për të zbuluar origjinën dhe destinacionin e lëndës narkotike, si dhe për identifikimin dhe arrestimin e personave të përfshirë në këtë veprimtari kriminale, ndërsa materialet i janë dorëzuar Prokurorisë për veprime të mëtejshme.