Në Qendrën Korrektuese në Dubravë, 41 të burgosur kanë përfunduar me sukses Programin e Aftësimit Profesional dhe janë certifikuar në profesione të ndryshme si metalpunues, zdrukthëtarë, hidroinstalues, ndërtimtarë dhe asistentë administrativë. Ceremonia e certifikimit u zhvillua me pjesëmarrjen e zëvendësministrit të Drejtësisë në detyrë, Genc Nimoni, i cili vlerësoi rëndësinë e këtyre programeve për rehabilitimin dhe riintegrimin e të dënuarve në shoqëri. Ai theksoi se Ministria e Drejtësisë ka prioritizuar zhvillimin e aftësimit profesional si një mënyrë për të krijuar mundësi reale për përfituesit, duke shpresuar që këto aftësi të përdoren edhe pas daljes nga institucioni korrektues. Nimoni uroi të gjithë të certifikuarit për suksesin e tyre dhe nënvizoi nevojën për zgjerimin e këtyre programeve në të ardhmen.