Pas një operacioni kërkim-shpëtimi të koordinuar dhe intensiv në malet e Prevallës, një grua 65-vjeçare me prejardhje nga Kosova dhe banim në Zvicër u gjet e gjallë dhe në gjendje të mirë shëndetësore. Ajo kishte humbur orientimin gjatë një shëtitjeje me familjarët dhe ishte ndarë nga grupi në një zonë të thellë malore, duke humbur kontaktin me ta. Pas raportimit të rastit, në kërkim u angazhuan zjarrfikësit, Policia e Kosovës dhe zyrtarë të Parkut Kombëtar, ndërsa në aksion mori pjesë edhe drejtori i Drejtorisë për Siguri dhe Emergjenca, Sead Arifi. Komandanti i Brigadës së Zjarrfikësve në Prizren, Flamur Hoti, dha detaje për rrethanat e humbjes dhe zhvillimin e operacionit që përfundoi me sukses pas më shumë se tri orësh kërkimesh.