Shtatë persona janë shtruar në Klinikën Infektive në Shkup me ethet e Nilit Perëndimor, ndërsa një 76-vjeçar ndodhet në gjendje kritike dhe mbështetje respiratore në repartin e kujdesit intensiv. Të gjithë pacientët kanë inflamacion viral të trurit dhe simptomat përfshijnë temperaturë të lartë, dhimbje koke të fortë, çorientim dhe çrregullim të vetëdijes. Gjashtë pacientët e tjerë janë mbi 60 vjeç dhe në gjendje të qëndrueshme, ndërsa vetëm një prej tyre ka udhëtuar jashtë vendit. Infektimi ka ndodhur përmes pickimit të mushkonjave të infektuara, me periudhë inkubacioni prej 3 deri në 14 ditë, dhe shumica e të infektuarve nuk e kuptojnë menjëherë praninë e virusit.