Një aksident i rëndë trafiku ka ndodhur në rrugën “Agim Ramadani – Katana” në Mitrovicë, ku një automjet i tipit kombi ka goditur një këmbësore 73-vjeçare. E lënduara është dërguar fillimisht në Spitalin Rajonal të Mitrovicës, ndërsa më pas është transferuar në Qendrën Klinike Universitare të Kosovës për trajtim të mëtejshëm. Drejtori i Emergjencës në QKUK, Naser Syla, ka bërë të ditur se pacientja ndodhet në gjendje të rëndë shëndetësore dhe është nënshtruar një ndërhyrjeje kirurgjikale nga ekipet e Neurokirurgjisë dhe Anesteziologjisë. Pas operacionit, ajo do të vazhdojë trajtimin në Klinikën e Mjekimit Intensiv, ndërsa Policia e Kosovës ka konfirmuar aksidentin dhe po heton rrethanat e ngjarjes.