Një vit pas tragjedisë në kabaren “Pulse” në Koçan, ku humbën jetën 63 persona dhe u lënduan mbi 200 të tjerë, prokuroria ka ngritur aktakuzë ndaj 78 personave për përgjegjësi në këtë ngjarje tragjike. Zjarri u shkaktua nga përdorimi i paligjshëm i mjeteve piroteknike gjatë një performance muzikore, ndërsa klubi funksiononte pa plotësuar kushtet minimale teknike dhe pa masa sigurie kundër zjarrit. Në mesin e të akuzuarve janë pronari i klubit, familjarët e tij, dy ish ministra të Ekonomisë, ish sekretarja shtetërore, ish kryetarë të komunës, drejtorë dhe inspektorë të Drejtorisë për Mbrojtje dhe Shpëtim, si dhe zyrtarë policorë dhe inspektorë të ndryshëm të akuzuar për keqpërdorime dhe ryshfete. Gjykimi, që ka nisur në nëntor të vitit të kaluar dhe vazhdon me dëgjimin e mbi 280 dëshmitarëve dhe shqyrtimin e mbi 1,400 provave, pritet të jetë i gjatë dhe kompleks.