Policia Rajonale e Ferizajt ka shqiptuar 834 gjoba brenda një jave ndaj shoferëve që kanë tejkaluar kufizimet e shpejtësisë në rrugët e rajonit. Ky veprim është pjesë e projekt-fushatës “Shpejtësia nuk është aftësi, është rrezik”, me moton “Mos e mat jetën me kilometra në orë”, që synon rritjen e sigurisë në komunikacion dhe parandalimin e aksidenteve rrugore. Policia apelon tek shoferët që të respektojnë kufizimet dhe të përshtatin ngasjen me kushtet e rrugës, duke theksuar se shpejtësia e papërshtatshme rrezikon jetën e tyre dhe të pjesëmarrësve të tjerë në trafik. Kontrollet do të vazhdojnë edhe në ditët në vijim, ndërsa qytetarët ftohen të bashkëpunojnë dhe të raportojnë shkeljet përmes aplikacionit “Lajmëro Policinë” ose në numrat e kontaktit, me garancinë e ruajtjes së konfidencialitetit.