Një aksident rrugor ka ndodhur në aksin Morinë-Kukës, ku një 43-vjeçare që po udhëtonte nga Kosova drejt Shqipërisë me një Volkswagen Polo me targa shqiptare, ka humbur kontrollin e automjetit dhe është përplasur me trafikndarësen. Shkaqet e aksidentit mbeten ende të paqarta dhe autoritetet po punojnë për zbardhjen e rrethanave të ngjarjes. Në vendin e aksidentit mbërriti ambulanca e Spitalit Rajonal të Kukësit, e cila i dha ndihmën e parë drejtueses dhe më pas e transportoi atë në spital për kontrolle dhe trajtim të mëtejshëm mjekësor. Gjendja shëndetësore e 43-vjeçares nuk është bërë ende e ditur.