Mbrëmjen e së dielës në Mitrovicën e Jugut, një veturë ka goditur dy këmbësorë, duke shkaktuar lëndime serioze tek njëri prej tyre. Të dy të lënduarit u dërguan në Shërbimin Emergjent të Spitalit “Sami Haxhibeqiri” rreth orës 21:00, ku pas ekzaminimeve u konstatua se njëri kishte pësuar hemorragji në tru dhe u transferua urgjentisht në Qendrën Klinike Universitare të Kosovës për trajtim të mëtejshëm. Ndërsa personi tjetër, pas marrjes së ndihmës së nevojshme, u lirua për në shtëpi. Autoritetet janë duke hetuar rrethanat e aksidentit për të sqaruar shkaqet dhe përgjegjësitë lidhur me këtë ngjarje.