Një aksident trafiku ka ndodhur në qendër të Prishtinës, pranë objektit të Komunës së Vjetër, ku një veturë ka goditur një këmbësor që po kalonte në vendkalimin për këmbësorë. Pamjet nga vendi i ngjarjes tregojnë se qytetarë të shumtë kanë ndaluar për t’i dhënë ndihmë personit të lënduar, ndërsa njësitë e Policisë së Kosovës kanë mbërritur për të menaxhuar situatën. Si pasojë e aksidentit, në këtë zonë është krijuar tollovi, duke vështirësuar qarkullimin në kryeqytet. Deri më tani nuk janë bërë të ditura rrethanat e aksidentit apo gjendja shëndetësore e këmbësorit, ndërsa autoritetet nuk kanë dhënë ende detaje shtesë. Lajmi pritet të përditësohet sapo të ketë informacione të reja nga Policia e Kosovës.