Një aksident i rëndë ka ndodhur në Unazën e Madhe të Tiranës, pranë rrethrrotullimit të TEG-ut, ku një betoniere është përplasur me një automjet “Audi” dhe ka rënë nga një urë në nivelin e poshtëm të aksit rrugor TEG–Elbasan. Si pasojë, dy persona që ndodheshin në betoniere, shtetas të huaj me kontratë pune në Shqipëri, kanë humbur jetën, ndërsa drejtuesi i “Audit” ka mbetur i plagosur dhe ndodhet në spital në gjendje stabile. Viktimat janë identifikuar si Mohamed Lotf, 30 vjeç, dhe Mohamed Ali, 40 vjeç, ndërsa drejtuesi i automjetit “Audi” është 28-vjeçari Roland Nuri. Policia ka bërë me dije se pas përplasjes, betoniereja ka thyer barrierat metalike mbrojtëse dhe ka rënë nga lartësia, duke shkaktuar këtë tragjedi në një nga rrugët kryesore të kryeqytetit.