Prokuroria e Qarkut në Split ka ngritur aktakuzë ndaj pilotit kroat J.I. dhe partneres së tij serbe A.M., të dyshuar për spiunazh. Piloti, i cili kishte shërbyer edhe në KFOR në Kosovë, dyshohet se i ka dhënë partneres së tij informacione të klasifikuara ushtarake, të cilat ajo i ka përcjellë më tej një shteti të huaj. Hetimet, ku u morën në pyetje dëshmitarë ushtarakë dhe u përfshi edhe Europol, zbuluan se informacionet përfshinin lëvizjet dhe pozicionet e forcave të KFOR-it në veri të Kosovës. Të dy të akuzuarit mohuan akuzat, por piloti u pezullua nga detyra dhe u lirua nga paraburgimi me masa kufizuese, ndërsa partnerja mbeti nën masën e paraburgimit për rrezikun e arratisjes. Me ngritjen e aktakuzës, rasti kalon në fazën e procedurës penale.