Prokuroria Speciale e Kosovës ka ngritur aktakuzë ndaj A.P. për vrasjen e rëndë dhe mbajtje të paautorizuar të armëve në lidhje me ngjarjen e 7 shtatorit 2015 në Prizren. Sipas aktakuzës, A.P. së bashku me të dënuarin B.P. kanë qëlluar me armë zjarri ndaj tre personave, ku njëri prej tyre, H.M., ka humbur jetën, ndërsa dy të tjerët kanë pësuar lëndime trupore me shkallë të ndryshme. Ngjarja dyshohet të ketë ndodhur për shkak të përfitimit pasuror. Rasti tashmë është përcjellë për shqyrtim në Gjykatën Themelore në Prishtinë, ndërsa i pandehuri ndodhet në paraburgim.