Prokuroria Speciale ka ngritur aktakuzë ndaj Ambroz Përlazerit për veprat penale “vrasje e rëndë” dhe “mbajtje të paautorizuar të armëve” lidhur me ngjarjen e 7 shtatorit 2015 në Prizren. Sipas aktakuzës, Përlazeri në bashkëkryerje me Bernard Përlazerin kanë shtënë me armë zjarri ndaj Hekuran Morinës, Fadil Morinës dhe një personi tjetër, duke shkaktuar vdekjen e Hekuranit dhe lëndime të rënda e të lehta për të tjerët. Ndërsa Bernard Përlazeri është dënuar me 22 vjet burgim në vitin 2018, Ambroz Përlazeri ndodhet aktualisht në paraburgim dhe rasti i tij është përcjellë për shqyrtim në Gjykatën Themelore në Prishtinë. Arrestimi i Ambrozit erdhi pas një periudhe të gjatë në arrati dhe pas aktivizimit të tri urdhër-arresteve ndaj tij.