Prokuroria Themelore në Ferizaj ka ngritur aktakuzë ndaj katër personave me inicialet Y.S, B.V, Sh.B dhe R.R, për veprën penale “Falsifikim i rezultateve të votimit” në zgjedhjet e 28 dhjetorit 2025. Sipas aktakuzës, ata kanë vepruar në bashkëkryerje gjatë procesit të numërimit të votave në Qendrën Komunale të Numërimit në Shtime, duke ndërmarrë veprime të koordinuara për të shtrembëruar rezultatet. I pandehuri Y.S ka lexuar dhe komunikuar në mënyrë të pasaktë votat, B.V ka regjistruar të dhëna të pasakta në sistemin elektronik pa lejuar verifikime, ndërsa Sh.B dhe R.R, edhe pse pjesëmarrës aktiv, nuk kanë ndërmarrë veprime për të parandaluar parregullsitë. Këto veprime kanë çuar në regjistrimin e rezultateve të pasakta, të cilat janë konstatuar gjatë rinumërimit në Qendrën e Numërimit dhe Rezultateve, duke cenuar integritetin dhe ligjshmërinë e procesit zgjedhor. Prokurori ka propozuar që pas shqyrtimit gjyqësor të shpallen fajtorë dhe të dënohen sipas ligjit.