Prokuroria Themelore në Prizren ka ngritur aktakuzë kundër B.J., person zyrtar, dhe J.B., përfaqësues i autorizuar i operatorëve ekonomikë “M.B.G.” Sh.P.K dhe “A.P.” Sh.P.K, për keqpërdorim të pozitës zyrtare dhe mashtrim në prokurim publik. Sipas aktakuzës, B.J. ka tejkaluar kompetencat dhe ka përpiluar raporte fiktive për punimet në projektin e infrastrukturës në fshatin Vlashnje, duke mashtruar Komisionin për Pranimin Teknik që ka konfirmuar në mënyrë të gabuar përfundimin e punimeve. Si pasojë, janë bërë pagesa në vlerë prej 18,765 euro për punime që nuk janë kryer sipas kontratës, duke shkaktuar dëm material komunës së Prizrenit dhe përfitim të kundërligjshëm për operatorët ekonomikë. Prokurori ka propozuar që pas shqyrtimit gjyqësor, të pandehurit të shpallen fajtorë dhe të dënohen sipas ligjit.