Prokuroria Speciale e Kosovës ka ngritur aktakuzë ndaj dy zyrtarëve të “Pallatit të Rinisë” në Prishtinë, A.Z. dhe F.Rr., për keqpërdorim të fondeve të ndërmarrjes në vlerë mbi 137 mijë euro gjatë viteve 2021-2022. A.Z., i cili ka shërbyer si menaxher i Financave dhe më pas ushtrues detyre i kryeshefit ekzekutiv, dyshohet se ka kryer transfere të paautorizuara në llogaritë personale dhe të të tjerëve, duke kryer veprat penale “Përvetësimi në detyrë” dhe “Keqpërdorimi i pozitës apo autoritetit zyrtar”. Ndërsa F.Rr., në cilësinë e zyrtarit përgjegjës për sigurim, akuzohet për “Ndihma në kryerjen e veprës penale – Keqpërdorimi i pozitës apo autoritetit zyrtar”, pasi ka ndihmuar në tërheqjen dhe dorëzimin e 9,250 eurove në para të gatshme. Prokuroria thekson përkushtimin e saj në luftimin e korrupsionit dhe keqpërdorimeve në sektorin publik, duke garantuar trajtim të paanshëm dhe profesional të rasteve të tilla.