Dhomat e Specializuara të Kosovës kanë konfirmuar se aktualisht nuk ka vendim të ri për shtyrjen e aktgjykimit ndaj ish-presidentit Hashim Thaçi dhe të tjerëve, ndërsa afati për shpalljen e tij është caktuar më së largu deri më 20 korrik 2026. Në maj, Trupi Gjykues kishte shtyrë afatin deri në këtë datë, duke lënë të hapur mundësinë e një shtyrjeje të mëtejshme vetëm në rast nevoje të domosdoshme, për të cilën do të njoftoheshin palët dhe publiku. Të akuzuarit, të cilët u arrestuan në nëntor 2020 dhe akuzohen për krime lufte dhe kundër njerëzimit gjatë periudhës 1998-1999, kanë mohuar të gjitha akuzat, duke argumentuar se lufta e UÇK-së ishte e drejtë dhe çlirimtare. Procesi gjyqësor, i nisur në prill 2023, është në fazën përfundimtare të përgatitjes së aktgjykimit, i cili pritet të shpallet brenda këtij muaji, përveç nëse Trupi Gjykues vendos ndryshe në ditët apo javët në vijim.