Inspektorët e Autoritetit Kombëtar të Ushqimit (AKU) në Tiranë kanë bllokuar 738 kilogramë fileto dhe gjoks pule pranë biznesit KMY, pasi mishi ishte i magazinuar në kushte të papërshtatshme, duke qëndruar në kontakt me tokën dhe pranë ambienteve me myk dhe ndryshk. Për shkak të këtyre shkeljeve, aktiviteti i KMY është pezulluar deri në përmbushjen e kushteve higjeno-sanitare. Një tjetër aksion u zhvillua në operatorin “Bonum”, ku u bllokuan 329 kilogramë djathë të bardhë dhie, pasi baxhoja ku prodhohej kishte mure me lagështirë dhe myk, duke sjellë një gjobë prej 300 mijë lekësh dhe bllokim të produktit. Produktet e konfiskuara nga të dy kompanitë do të asgjesohen për të parandaluar rreziqet për konsumatorët, ndërsa AKU paralajmëron inspektime të mëtejshme për sigurinë ushqimore në vend.