Ish-zëvendësministri serb për Komunitete dhe Kthim, Radoica Radomirovic, ka dorëzuar një kallëzim penal në Prokurorinë Themelore në Mitrovicë, duke akuzuar zyrtarë komunalë nga Lista Serbe për keqpërdorime financiare në komunën e Leposaviqit. Ai pretendon se janë kryer vepra penale si keqpërdorim i detyrës zyrtare, mashtrim me prokurim publik dhe falsifikim dokumentesh, me dëme që arrijnë rreth një milion euro. Radomirovic thekson se projektet financohen njëkohësisht nga buxheti i Serbisë dhe ai i Kosovës, por shumë prej tyre nuk janë realizuar, ndërsa paratë janë keqpërdorur. Ai fton institucionet që të përfshihen në hetime dhe paralajmëron se do të ketë edhe kallëzime të tjera, duke kërkuar që përgjegjësit të përballen me drejtësinë dhe që paratë e humbura t’u kthehen qytetarëve.