Burim Maloku, specialist i Mjekësisë Emergjente dhe Radiologjisë në Spitalin “Dr. Sami Haxhibeqiri” në Mitrovicë dhe Kapiten në Forcën e Sigurisë së Kosovës, ka bërë një apel urgjent për rritjen e kujdesit gjatë vozitjes për shkak të rritjes së aksidenteve rrugore. Ai thekson se, pavarësisht punës profesionale të policisë së trafikut, emergjenca po përballet çdo ditë me raste të rënda të lëndimeve nga aksidentet, që shpesh mund të parandalohen. Mjeku apelon për respektimin e shpejtësisë së lejuar, mos përdorimin e telefonit gjatë vozitjes, vendosjen e rripit të sigurisë, shmangien e drejtimit nën ndikimin e alkoolit apo lodhjes dhe kujdes të veçantë për këmbësorët. Ai përmend se çdo pakujdesi, edhe për një sekondë, mund të shkaktojë pasoja të pakthyeshme dhe nxit drejtuesit e automjeteve të mendojnë për jetën e tyre dhe të familjeve që i presin në shtëpi.