Gjykata e Apelit ka vërtetuar vendimin e Gjykatës Themelore në Prishtinë, duke konfirmuar aktakuzën e Prokurorisë Speciale ndaj pesë personave dhe tre personave juridikë, të akuzuar për shpëlarje parash përmes falsifikimit të dokumenteve në sektorin shëndetësor. Të pandehurit, përfshirë pronarë dhe përfaqësues ligjorë të institucioneve shëndetësore, akuzohen se kanë përdorur dokumente false për të legjitimuar transaksione mbi 3 milionë euro dhe për të mashtruar Administratën Tatimore të Kosovës. Apeli ka refuzuar pretendimet e mbrojtjes për hudhjen e aktakuzës dhe ka theksuar se në këtë fazë nuk bëhet vlerësimi përfundimtar i fajësisë, por vetëm ekzistenca e dyshimit të bazuar për veprën penale. Pas këtij vendimi, Gjykata Themelore pritet të caktojë seancën e shqyrtimit gjyqësor, ku do të shqyrtohet më tej përgjegjësia penale e të akuzuarve.