Gjykata e Apelit ka vërtetuar dënimin me 6 muaj burgim me kusht për Erden Atiqin, ish-kryetarin e Komunës së Mitrovicës së Veriut, për ndërprerjen e transmetimit të seancës së Kuvendit të Kosovës në RTK në shtator të vitit 2016. Apeli ka refuzuar ankesën e mbrojtësit të Atiqit, duke konfirmuar se vendimi i Gjykatës Themelore në Prishtinë është i qartë dhe i bazuar në prova të mjaftueshme, dhe nuk ka shkelje esenciale të procedurës penale. Në vendim theksohet se Atiqi ka kryer veprën penale “Asgjësimi, dëmtimi ose heqja e instalimeve publike” dhe se nuk ka arsye për një dënim më të butë, ndërsa janë marrë parasysh rrethanat lehtësuese si fakti që është hera e parë që bie ndesh me ligjin. Atiq nuk ishte deklaruar për fajësinë në seancën fillestare dhe kishte thënë se do të mbrohej në heshtje, ndërsa aktakuza e Prokurorisë Themelore e ngarkonte për ndërprerjen e transmetimit duke hequr kabllon nga rrjeti optik i RTK-së.