Gjykata e Apelit ka vërtetuar dënimin me 4 vjet e gjysmë burgim për Shkumbin Sekiraqën, i akuzuar për lëndim të lehtë trupor dhe armëmbajtje pa leje, duke lënë në fuqi vendimin e Gjykatës Themelore në Prishtinë. Ai u lirua nga akuza për shkaktim të rrezikut të përgjithshëm, pasi Apeli konstatoi se nuk kishte prova që të tregonin rrezik real për jetën e të tjerëve gjatë ngjarjes. Sipas aktakuzës, më 4 mars 2024, Sekiraqa kishte sulmuar Pajtim Gashin me armë zjarri dhe kondak revolje, duke i shkaktuar lëndime në kokë dhe këmbë, ndërsa bashkëpunëtori i tij, Muhedin Haliti, u lirua nga akuza. Vendimi i Apelit thekson se dënimi është i drejtë duke marrë parasysh rrethanat lehtësuese dhe rënduese, si mosha e të pandehurit dhe intensiteti i veprës së kryer.