Gjykata e Apelit ka anuluar aktgjykimin e Gjykatës Themelore në Prishtinë dhe ka kthyer në rigjykim rastin ndaj Çedomir Aksiqit, i cili ishte dënuar në mungesë me 15 vjet burg për krime lufte, përfshirë pjesëmarrjen në masakrën e Reçakut në vitin 1999. Apeli ka konstatuar se gjykimi në mungesë është zhvilluar pa u përmbushur kushtet ligjore të nenit 303 të Kodit të Procedurës Penale, pasi nuk janë ndërmarrë përpjekje të arsyeshme për njoftimin e të akuzuarit dhe sigurimin e pranisë së tij në seancë. Gjykata e shkallës së parë nuk ka siguruar prova për publikimin e ftesës dhe aktakuzës në faqet zyrtare dhe nuk ka zhvilluar një fushatë informative të plotë, siç kërkohet nga ligji. Në vendimin e Apelit theksohet se këto shkelje procedurale janë esenciale dhe e bëjnë aktgjykimin e parë të paligjshëm, prandaj çështja duhet të rishqyrtohet nga fillimi në rigjykim dhe vendosje.