Gjykata e Apelit ka anuluar vendimin lirues të Gjykatës Themelore në Prishtinë dhe ka kthyer në rigjykim rastin ku akuzohen Mendim Sojeva dhe Ganimete Gashi-Ahmeti për përvetësimin e mbi 1 milion eurove. Sojeva, zyrtar i Agjencisë së Kosovës për Produkte dhe Pajisje Medicinale, akuzohet për përvetësim në detyrë, ndërsa Gashi-Ahmeti për hyrje të paautorizuar në sistemet kompjuterike. Apeli ka konstatuar shkelje esenciale të procedurës penale dhe mungesë arsyetimi të mjaftueshëm në aktgjykimin e shkallës së parë, duke vënë në dyshim vërtetimin e gjendjes faktike dhe lidhjen e provave me përgjegjësinë e të akuzuarve. Sipas aktakuzës, Sojeva dyshohet se ka keqpërdorur fjalëkalimet e zyrtarëve të tjerë për të arsyetuar shpenzime të avancave të tërhequra nga banka në emër të zyrtarëve të AKPPM-së, duke shkaktuar dëm të konsiderueshëm buxhetit të institucionit.