Në Gjykatën e Apelit po shqyrtohet ankesa e Prokurorisë ndaj vendimit të Gjykatës Themelore në Prishtinë, e cila kishte liruar nga akuza Gavrilo Milosavleviqin, i akuzuar për krime lufte në burgun e Dubravës. Deputeti dhe i mbijetuar i masakrës, Nait Hasani, kërkoi dënimin e tij, duke theksuar se Milosavleviq ishte pjesë e gardianëve që vranë dhe torturuan të burgosurit shqiptarë gjatë luftës. Prokuroria pretendon se aktgjykimi i Themelores përmban shkelje ligjore dhe kërkon që Milosavleviq të shpallet fajtor ose që çështja të kthehet në rigjykim, ndërsa mbrojtja propozon që aktgjykimi lirues të vërtetohet. Në seancën e Apelit, i dëmtuari Visar Balloci u shpreh se nuk ishte ftuar në shqyrtimin e parë, ndërsa i akuzuari Milosavleviq nuk ishte prezent pasi është shpërngulur nga adresa e tij në Istog.