Spitali i Përgjithshëm në Pejë ka bërë një apel urgjent drejtuar institucioneve përgjegjëse për largimin e mbeturinave nga oborri i tij, duke theksuar se kjo situatë rrezikon funksionimin normal të institucionit dhe sigurinë e pacientëve, stafit dhe qytetarëve. Në reagimin e tij, spitali shpjegon se prodhon sasi të mëdha mbeturinash çdo ditë dhe se mbajtja e tyre për periudha të gjata krijon rrezik për përhapjen e infeksioneve dhe cenon kushtet higjieno-sanitare. Ata theksojnë se nuk janë shkaktarë të situatës, pasi kanë përmbushur të gjitha obligimet ndaj shërbimit të largimit të mbeturinave, dhe kërkojnë ndërhyrje urgjente dhe koordinim institucional për zgjidhjen e problemit. Spitali kërkon trajtim prioritar për këtë çështje në interes të mbrojtjes së shëndetit publik dhe garantimit të funksionimit të pandërprerë të shërbimeve shëndetësore.