Orijol Rukaj, një shqiptar 47-vjeçar i burgosur në Australi për trafik droge, u arratis gjatë funeralit të vëllait të tij në Melbourne, ku kishte marrë leje të posaçme për pjesëmarrje. Ai ishte nën mbikëqyrje të stafit korrektues dhe madje ndihmoi në bartjen e arkivolit, por pas ceremonisë u zhduk pa lënë gjurmë, duke shpëtuar nga efektivët që e shoqëronin. Policia australiane dyshon se arratisja ishte planifikuar paraprakisht dhe se Rukaj ka marrë ndihmë nga disa persona, disa prej të cilëve ndodhen jashtë vendit, ndërsa një i dyshuar është ndaluar dhe më pas liruar pa akuza. Hetimet vazhdojnë me kontrollin e rreth 20 lokacioneve dhe intervistimin e familjarëve dhe bashkëpunëtorëve, ndërsa autoritetet besojnë se shqiptari është ende në zonën metropolitane të Melbourne dhe kërkojnë ndihmën e publikut për kapjen e tij.