Policia e Kosovës në Ferizaj ka arrestuar një person nën dyshimet për blerje, shitje dhe posedim të narkotikëve, pas një hetimi dhe veprimesh operative të ndërmarra në bazë të informacioneve për aktivitetin e dyshuar në Kaçanik. Gjatë kontrollit në shtëpinë dhe objektet përcjellëse të të dyshuarit janë sekuestruar substanca narkotike marihuanë në sasi të ndryshme, një grinder, letra për mbështjellje, rreth 130 qese të zbrazëta për paketim, një pushkë gjuetie, telefon dhe para të gatshme. Rasti është referuar prokurorit kompetent dhe ndaj të dyshuarit është iniciuar procedura për veprën penale të blerjes, posedimit dhe shpërndarjes së paautorizuar të narkotikëve. Pas intervistimit, ndaj tij është lëshuar aktvendim për ndalim prej 48 orësh, ndërsa policia vazhdon hetimet lidhur me këtë çështje.