Një aksion i gjerë i Krimeve Ekonomike dhe Prokurorisë Speciale të Republikës së Kosovës u zhvillua mëngjesin e djeshëm në Prishtinë, duke rezultuar me arrestimin e shtatë personave nën dyshimet për korrupsion, ryshfet dhe manipulime në shpronësimin e tokave. Mes të arrestuarve janë emra të njohur, përfshirë Shaban Syla, Halil Mustafa dhe Vegim Gashi, të cilët janë dërguar në mbajtje për 48 orë me vendim të Prokurorit Special. Gjatë aksionit janë kryer kontrolle në tetë lokacione të ndryshme, ku janë sekuestruar telefona, laptopë, dokumente, pajisje elektronike dhe një shumë prej 6450 euro cash, të cilat dyshohet se lidhen me aferën në hetim. Hetimet vazhdojnë intensivisht, ndërsa të dyshuarit janë intervistuar në prezencë të avokatëve mbrojtës, duke theksuar se ata prezumohen të pafajshëm deri në vendim të formës së prerë nga gjykata.