Një person është shoqëruar në stacionin policor gjatë një aksioni për lirimin e hapësirave në pronësi të Ministrisë së Bujqësisë, Pylltarisë dhe Zhvillimit Rural në Prishtinë. Aksioni po zhvillohej në zonën ku po rrënohej ish-pompa e derivateve “Patroni”, në përgatitje të ndërtimit të objektit të ri të ministrisë. Policia e Kosovës njoftoi se personi u arrestua për mosrespektim të urdhrave policorë dhe për qëndrimin brenda perimetrit të sigurisë, pavarësisht kërkesave për largim. Veprimet e mëtejshme po kryhen në koordinim me Prokurorinë e Shtetit, ndërsa aksioni po vijon nën masa të shtuara sigurie.