Kreu i SPAK, Klodian Braho, ka konfirmuar se arrestimi i Ermal Beqirajt në Francë nuk ka qenë rastësor, pasi prokuroria ka qenë në kontakt të vazhdueshëm me autoritetet franceze dhe ka dërguar letërporosi për vendndodhjen e tij para ndalimit. Beqiraj, i shpallur në kërkim ndërkombëtar për dosjen “AKSHI”, ndodhet aktualisht në paraburgim në Francë dhe pritet të ndiqen procedurat ligjore për ekstradimin e tij drejt Shqipërisë. Braho ka bërë me dije gjithashtu se SPAK ka kërkuar sekuestrimin e të gjitha pasurive të Beqirajt në Francë, përfshirë avionët dhe pasuri të tjera, duke theksuar se procesi është në zhvillim e sipër. Arrestimi u realizua falë bashkëpunimit mes Interpol Tiranës dhe Interpol Lion, ndërsa ndaj Beqirajt janë caktuar masa sigurie për disa vepra penale serioze.