Më 7 gusht, një shtetas 48-vjeçar nga Kosova u arrestua në pikën kufitare Karasoviqi, në kufirin mes Kroacisë dhe Malit të Zi, pasi ndaj tij ishte lëshuar një urdhër-kërkim ndërkombëtar për krime lufte nga Serbia. Policia kroate konfirmoi arrestimin, por nuk dha detaje të mëtejshme për identitetin apo akuzat specifike. Personi i arrestuar, sipas mediave kroate, është B.B. nga Nerodimja e Poshtme e Ferizajt, i cili iu dorëzua juridiksionit të Gjykatës së Qarkut në Dubrovnik. Nënkryetari i OVL UÇK-së, Gazmend Syla, deklaroi se bazuar në informacionet fillestare, B.B. nuk figuron në listat e veteranëve të UÇK-së, duke shtuar se është shumë e mundshme që ai të mos ketë qenë pjesë e kësaj organizate.