Në Elbasan janë arrestuar në flagrancë dy persona të përfshirë në trafikimin e lëndëve narkotike kokainë dhe kanabis. Shtetasi F. P., 37 vjeç, akuzohet për prodhimin dhe shitjen e narkotikëve si dhe për mbajtje pa leje të armëve të ftohta, ndërsa miku i tij, L. Xh., 34 vjeç, u arrestua për moskallëzim krimi dhe ka precedent penal në fushën e narkotikëve. Operacioni policor i koduar “Bulevardi” u organizua nga Specialistët për Hetimin e Narkotikëve në DVP Elbasan dhe Forca e Posaçme “Shqiponja”, nën drejtimin e Prokurorisë Elbasan. Gjatë kontrollit në automjetin tip “Mercedes Benz”, ku udhëtonin të dy të arrestuarit, u sekuestruan lëndë narkotike të ndara në doza, një shkop metalik me hapje, tre aparate celularë, automjeti dhe një shumë parash në euro dhe lekë, të dyshuara të përfituara nga aktiviteti kriminal. Materialet i janë dorëzuar Prokurorisë së Elbasanit për hetime të mëtejshme.