Njësitet e Hetimeve të Kryeqytetit në Prishtinë kanë arrestuar dy persona, A.D. (47 vjeç) dhe H.M. (48 vjeç), të dyshuar për kryerjen e 27 vjedhjeve të rënda në zona të ndryshme të qytetit. Gjatë hetimeve intensive janë siguruar prova materiale që lidhin të dyshuarit me këto vepra penale, ndërsa në vendbanimet e tyre janë kryer kontrolle dhe janë sekuestruar prova shtesë. Hetimet janë zhvilluar në koordinim me Prokurorinë e Shtetit, me qëllim ndriçimin e plotë të rasteve. Me vendim të Prokurorit, të dyshuarit janë ndaluar për 48 orë për procedura të mëtejshme ligjore.