Policia në Tetovë ka arrestuar një 15-vjeçar nga fshati Xhepçishtë, i dyshuar për dërgimin e kërcënimeve për vendosje të bombave dhe sulm në një shkollë të mesme në Tetovë. Gjatë bastisjes në shtëpinë e familjes së tij u gjetën armë dhe municione, të cilat sipas policisë ishin me leje të prindit. Në të njëjtën periudhë, është arrestuar edhe një 18-vjeçar nga Pallatica e Tetovës, i dyshuar për kërcënime në shkollën e mesme të mjekësisë në qytet. Psikologu Lulzim Murezani ka theksuar se këto kërcënime krijojnë pasiguri dhe ankth te nxënësit, duke ndikuar negativisht në procesin arsimor, dhe ka bërë thirrje për veprime të koordinuara ndërinstitucionale për trajtimin profesional të rasteve të tilla.