Katër funksionarë të policisë në Sarandë janë arrestuar nga Agjencia e Mbikëqyrjes Policore dhe Policia e Shtetit, pasi dyshohen për lehtësimin dhe favorizimin e ndërtimeve pa leje në qytet. Ata akuzohen për shpërdorim detyre, kryerje veprimesh arbitrare dhe mosmarrje masash për ndërprerjen e veprimtarive të paligjshme, duke krijuar skema për përfitim të paligjshëm dhe shmangie të përgjegjësisë ligjore. Hetimet vazhdojnë për të zbuluar të gjithë personat e përfshirë dhe për të dokumentuar përgjegjësitë penale në këtë rast. Agjencia e Mbikëqyrjes Policore thekson angazhimin e saj për të luftuar çdo formë abuzimi me detyrën dhe bashkëpunim me elementë kriminalë, pavarësisht pozicionit të të përfshirëve.