Një shtetas i Kosovës dhe një shtetas i Serbisë janë arrestuar në Prishtinë, të dyshuar për mashtrim, falsifikim dokumentesh dhe legalizim të përmbajtjes së rreme, lidhur me një pronë të paluajtshme në zonën e Veternikut. Hetimi, i zhvilluar disa muaj, ka zbuluar përdorimin e dokumenteve të falsifikuara për përfitim të kundërligjshëm në një pronë prej 56 ari. Gjatë kontrollit janë sekuestruar para të gatshme në vlerë rreth 20 mijë euro, katër telefona celularë, dokumente të ndryshme dhe një veturë me vlerë deri në 60 mijë euro. Pas intervistimit, të dyshuarit janë dërguar në mbajtje dhe hetimet vazhdojnë në koordinim me Prokurorinë Themelore në Prishtinë dhe Policinë e Kosovës për zbardhjen e plotë të rastit.