Në një operacion të koordinuar ndërkombëtarisht mes Shqipërisë, Italisë dhe Spanjës, policia shqiptare arrestoi dy shtetas të kërkuar për trafikim droge dhe pjesëmarrje në organizatë kriminale. Enkelet Avduli, 46 vjeç, u kap në aksin rrugor Rrogozhinë-Peqin, pasi Gjykata e Apelit të Bolonjës e kishte dënuar me mbi 7 vjet burg për trafik droge, armëmbajtje pa leje dhe kanosje. Ndërsa Sadik Kasa, 38 vjeç, u arrestua në fshatin Sukth i Ri, pasi autoritetet spanjolle e kishin shpallur në kërkim për trafik droge dhe pjesëmarrje në organizatë kriminale. Të dy janë arrestuar provizorisht me qëllim ekstradimin, ndërsa Interpol Tirana po vijon procedurat në bashkëpunim me autoritetet italiane dhe spanjolle për dorëzimin e tyre në drejtësitë përkatëse.