Policia e Kosovës ka kryer një aksion në tri rajone – Ferizaj, Gjilan dhe Prishtinë – ku janë arrestuar pesë persona nën dyshimin për falsifikim dokumentesh dhe mashtrim me prona. Të dyshuarit dyshohet se kanë falsifikuar dokumente duke u paraqitur si pronarë të disa parcelave në një fshat të Ferizajt, ndërsa njëri prej tyre akuzohet për keqpërdorim të pozitës apo autoritetit zyrtar. Gjatë aksionit janë sekuestruar dokumente dhe prova të ndryshme që do të përdoren në procedurat hetimore. Të arrestuarit janë intervistuar në prani të avokatëve mbrojtës dhe janë ndaluar për 48 orë me vendim të prokurorit.