Tre persona janë arrestuar në Vlorë pasi dyshohet se kanë kanosur një 30-vjeçar për t’i marrë 30 mijë euro dhe më pas i kanë marrë automjetin tip “BMW”. Ngjarja ndodhi në lagjen “Pavarësia”, ku autorët, të armatosur dhe kërcënues, i kërkuan viktimës shumën e parave dhe më pas u larguan me makinën e tij. Policia e Vlorës finalizoi operacionin “Strike”, duke arrestuar tre të rinj banues në qytet dhe sekuestruar automjetin e përdorur nga autorët dhe makinën e marrë nga viktima. Materialet i janë referuar Prokurorisë së Vlorës për veprime të mëtejshme për veprën penale “Shtrëngimi me anë të kanosjes ose dhunës për dhënien e pasurisë”, kryer në bashkëpunim.