Policia Kufitare në Pikën e Kalimit Kufitar të Rinasit ka ndaluar një tentativë trafikimi armësh nga Shqipëria drejt Mbretërisë së Bashkuar. Gjatë kontrolleve të intensifikuara në dalje të vendit, në bagazhin e një shtetasi shqiptar me nënshtetësi britanike, 42 vjeç, u gjet një pistoletë me municion luftarak, e cila u sekuestrua si provë materiale. Personi u arrestua në flagrancë dhe materialet procedurale iu referuan Prokurorisë së Tiranës për veprën penale “Trafikimi i armëve dhe i municionit”. Ky operacion u realizua në bashkëpunim me shërbimet e sigurisë në aeroportin e Rinasit, duke u bazuar në analiza të riskut dhe informacionet e inteligjencës policore.