Një 67-vjeçar me inicialet K.K. u arrestua në Berat gjatë operacionit policor të koduar “Produkti”, pasi u kap me mbi 54 mijë euro dhe shuma të tjera valutash që dyshohet se rrjedhin nga veprimtari të kundërligjshme. Gjatë kontrollit në automjetin dhe banesën e tij u sekuestruan gjithashtu 2020 paund, 1850 dollarë, 2850 franga, një automjet dhe një aparat celular. Policia dhe specialistët e Hetimit të Krimeve Ekonomiko-Financiare po vijojnë veprimet hetimore për dokumentimin e plotë të rastit dhe identifikimin e personave të tjerë të përfshirë. Materialet i janë kaluar Prokurorisë pranë Gjykatës së Shkallës së Parë në Berat për veprën penale “Pastrimi i produkteve të veprës penale ose veprimtarisë kriminale”.